Ligji i ri për strehimin social ka marrë “OK” në komisione parlamentare. Në ndryshimet e propozuara, ndër më të rëndësishmit është përfshirja e punonjësve të administratës publike në strehimin social.
Rreth 130 mijë punonjës të administratës kanë mundësi të aplikojnë në programet sociale. Gjithashtu punonjësit publikë do të kenë mundësinë të marrin edhe kredi me normë fikse 3%, ndërsa pjesa tjetër e interesit do të subvencionohet nga buxheti i shtetit. Ndërkohë me kredi me 0% interes do trajtohen familjet e policëve të rënë në detyrë.
Çdo institucion shtetëror do të shqyrtojë kërkesat e kredive për strehim të punonjësve të tyre, ndërsa kuotat e kredive të reja do të miratohen çdo vit me vendim të Këshillit të Ministrave. Më ligjin e ri, “familja e re” që do bëjë kërkesë të hyjë në programin e strehimit nuk mund të jetë mbi moshën 38-vjeçare. Për kërkesat e strehimit social në çdo bashki tashmë aplikimet do të kalojnë në e-albania, ku digjitalizimi është një tjetër pikë kryesore e ligjit të ri./ Top Channel
