Presidenti amerikan Donald Trump njoftoi të premten, më 6 nëntor, zëvendësimin e shefes së stafit të Shtëpisë së Bardhë, Susie Wiles, me Stephen Millerin.
Wiles, emri i së cilës u përdor edhe gjatë fushatës elektorale të Sali Berishës për të ushqyer mesazhin e afrimit me administratën amerikane, do të kalojë në strukturën politike të presidentit. Miller do të marrë detyrën të hënën, më 9 nëntor.
Ndryshimi vjen pas humbjeve të republikanëve në zgjedhjet e mesmandatit. Sipas CBS News, Wiles kishte paraqitur dorëheqjen të enjten në mbrëmje dhe largimi i saj lidhej me rezultatin zgjedhor. Trump vlerësoi punën e saj, por deklaroi se kishte vendosur të bënte një ndryshim në drejtimin e stafit presidencial.
Miller, deri tani zëvendësshef i stafit, është një prej bashkëpunëtorëve më të afërt të Trumpit dhe ndër hartuesit kryesorë të politikës së tij të ashpër ndaj emigracionit. Emërimi i tij pas humbjes elektorale sinjalizon vazhdimin e kësaj vije politike, ndërsa administrata përgatitet të përballet me një Kongres të kontrolluar nga demokratët.
Emri i Susie Wiles mori vëmendje në Shqipëri gjatë fushatës për zgjedhjet parlamentare të 11 majit 2025. Berisha kishte angazhuar si këshilltar elektoral Chris LaCivitën, i cili kishte drejtuar së bashku me Wiles fushatën presidenciale të Trumpit. Paralelisht, sipas Associated Press, Berisha kishte lidhur një kontratë dyvjeçare prej 6 milionë dollarësh me firmën amerikane të lobimit Continental Strategy, në stafin e së cilës përfshihej Katie Wiles, vajza e shefes së stafit të Shtëpisë së Bardhë.
Këto lidhje profesionale dhe familjare shërbyen si sfond për mesazhin elektoral të afrimit me Uashingtonin. Episodi më i dukshëm ishte mitingu përmbyllës i PD-së në Shkodër, më 8 maj 2025, kur LaCivita dhe Berisha i uruan publikisht ditëlindjen Susie Wiles.
Vetë faqja zyrtare e Partisë Demokratike e dokumenton urimin. Berisha e prezantoi Wiles si bashkarkitekte të rikthimit të Trumpit në Shtëpinë e Bardhë dhe ftoi pjesëmarrësit të bashkoheshin me LaCivitën për t’i uruar jetë të gjatë e suksese. Urimi u bë tri ditë përpara votimit, duke e futur emrin e drejtueses së stafit presidencial amerikan në skenën e fushatës së opozitës shqiptare.
Urimi pati edhe një hollësi domethënëse: u bë më 8 maj, ndërsa ditëlindja e Wiles ishte më 14 maj. Kjo mospërputhje nxiti që atëherë kritika se emri i saj po përdorej për t’u krijuar votuesve përshtypjen e mbështetjes nga Shtëpia e Bardhë./ Gazeta Tema
