Forca të shumta të Policisë së Shtetit, përfshirë edhe ato RENEA kanë zbarkuar në një mega-operacion në kampin MEK në Durrës, për të ushtruar kontrolle në të gjitha ambientet dhe zyrat ku janë strehuar aktivistë të opozitës iraniane.
Ministria e Brendshme ka reaguar lidhur me tensionet në kampin e MEK, ku një shtetas iranian ka humbur jetën kurse uniformat blu sqarojnë se vdekja e muxhahedinit nuk ka ardhur si pasojë e përplasjes me policinë.
“Operacioni i sotëm i Policisë së Shtetit në vendqëndrimin e MEK në Manëz të Durrësit është në zbatim të plotë të urdhrit të SPAK. Fatkeqësisht ky grupim ka thyer marrëveshjen. Ndërhyrja e Policisë së Shtetit ka qenë konform ligjit. Veprimet e Policisë për zbatimin e ligjit janë kryer si në çdo pjesë tjetër të territorit te Republikes se Shqiperise. Fatkeqësisht brenda kampit ka pasur rezistencë ndaj kryerjes së punës së Policisë së Shtetit, çka bie ndesh me kuadrin procedural të zbatimit të ligjit. Bazuar në të dhënat e Policisë së Shtetit, gjatë operacionit nuk ka pasur humbje jete dhe as të lënduar. Për çdo pretendim për humbje jete në spitalin e vendqëndrimit të tyre po bëhen të gjitha verifikimet”, njofton Ministria e Brendshme.
