Gjykata e Posaçme Kundër Korrupsionit dhe Krimit të Organizuar ka lënë në burg kryebashkiakun e zgjedhur të Himarës, Fredi Beleri.
Avokatët e tij kërkuan masë më të lehtë sigurie, në mënyrë që Beleri të kishte mundësinë dhe të betohet për detyrën e kryebashkiakut, të fituar në zgjedhjet e 14 majit.
Sot ka pasur deklarata të forta dhe kërcënime nga Athina zyrtare sipas të cilave, “nëse Fredi Beleri nuk lejohet të bëjë betimin, Shqipëria të harrojë fondet e BE, apo integrimin europian”.
Pavarësisht kërkesës së avokatëve dhe kërcënimeve nga Greqi, GJKKO ka lënë në burg Fredi Belerin i cili mbahet në pranga prej 12 majit të këtij viti, pasi u arrestua për blerjen e votave të 8 qytetarëve kundrejt 400 mijë lekëve të vjetra.
