Avokati i njohur, Spartak Ngjela ka reaguar lidhur me lajmin se ish-kryeministri Fatos Nano është shtruar në spital.
Ngjela thotë se PS duhet të tregojë një interesim më të madh lidhur me kurimin e Nanos. Kjo pasi sipas tij, Nano është një individ i veçantë në historinë e Shqipërisë, i cili formoi një të majtë me koncepte moderne. Ai shtoi gjithashtu se Nano lejoi në PS mendimin kundër, si asnjë parti në Shqipëri, që nga viti 1946 e deri në ditët e sotme.
“Fatos Nano është në gjendje jo të mirë shëndetësore! Lideri historik i PS shtrohet në reanimacion në Tiranë. Unë i uroj një shërim sa më të shpejtë. Nuk e di sa i vërtetë mund të jetë ky lajm, por Partia Socialiste duhet të tregojë një interesim të madh në kurimin sa më shpejt të Fatos Nanos. Ai është një individ i veçantë në historinë politike të Shqipërisë… Fatos Nano i dha shumë historisë së shtetit shqiptar, dhe deri tani ai është kampioni i vetëm i kryeministrit shqiptar që dinte ta mbronte personalitetin e tij, jo me “rasson” e kryeministrit si mjet presioni, por me intelektin e tij të lartë qytetar që ai e disponon në formimin e tij shkencor.”– shprehet Ngjela.
