Kryeministri Edi Rama ka paralajmëruar se gjatë vitit të ardhshëm, paga mesatare do të shkojë deri në 900 euro në sektorin publik, siç edhe kishte premtuar më herët.
Teksa foli në asamblenë e PS në Durrës, Rama u ndal edhe tek çmimi i energjisë elektrike, për të cilin tha nuk është rritur, e nuk do të rritet as në vazhdim.
“Dhe vitin e ardhshëm, përpara se ne e parashikonim, në mes të vitit të ardhshëm, paga mesatare në Shqipëri do të shkojë në 900 euro. Nuk ka pasur asnjë rritje të çmimit të energjisë në Shqipëri, por ka pasur një rritje në blerje nga importi. Nuk ka patur rritje për qytetarët, sepse diferencën mes çmimeve qeveria e ka mbuluar në mënyrë që fatura për çdo familje të mos ndryshojë. Po ashtu ne sot që përgatisim miratimin e buxhetit të vitit tjetër, shikojmë një tjetër shifër domethënëse”– tha Rama.
