Sektori i ndërtimit po përjeton një “qetësi” muajt e fundit kjo për shkak të rënies së kërkesave për blerje dhe porosive të apartamenteve.
Ky është një lajm i mirë për të gjithe ata që kanë planifikuar që të blenë një apartament në të ardhmen pasi me uljen e kërkesës mund të ketë rënie të çmimit të apartamenteve që mund të ngelin “stok”.
Sipas Bankës, treguesi i besimit në ndërtim (TBN) ra me 1.9 pikë përqindjeje në muajin tetor, ndonëse qëndron rreth 15 pikë përqindje mbi mesataren afatgjatë.
Rënia këtë muaj u përcaktua si nga vlerësimet më pak optimiste për aktivitetin aktual ndërtues ashtu edhe për nivelin e porosive aktuale. Pritjet për punësimin janë në rritje dhe ato për çmimet në të ardhmen janë në rënie.
Indeksi i besimit në ndërtim iu kthye në territor negativ në shtator (-9.26), pasi kishte qëndruar pozitiv pothuajse përgjatë gjithë vitit dhe në tetor treguesi u përkeqësua dhe më tej në -11.2, duke treguar se pjesa më e madhe e ndërtuesve janë pesimistë për porositë në të ardhmen.
Blerjet e pasurive të paluajtshme nga paratë informale (aktivitetet e paligjshme, korrupsioni etj) vlerësohet se kanë qenë një nga burimet kryesore që kane rritur çmimet e apartamenteve ne kryeqytet.
