Kreu i SPAK, Altin Dumani i ka kërkuar Qeverise Rama 309 milionë lekë shtesë në buxhetin e 2024-ës për godinën me zyrat e reja të punës.
Gjatë diskutimit për buxhetin në Komisionin e Ligjeve, Dumani kërkoi që paratë e planifikuara si të ndara në 2 vitet e ardhshme të jepen brenda vitit 2024, pasi SPAK është në emergjencë për ambiente pune. Për të zgjidhur këtë problem SPAK mori një tjetër godinë ngjitur me zyrat ekzistuese në rrugën “Jordan Misja” por që ajo të vihet në funksion të SPAK dhe BKH, nevojiten investime.
Kreu i SPAK, Altin Dumani, kërkoi në Komisionin e Ligjeve, shtesë buxheti 309 milionë lekë për vitin 2024 që institucioni të funksionojë si duhet, ndërkohë që Ministria e Financave ka parashikuar alokim fondesh të ndarë për vitin 2024 dhe pjesën më të madhe në 2025-ën.
“Është bërë një ndarje, një pjesë në vitin 2024, një pjesë në vitin 2025. Bëhet fjalë për një godinë që na është dhënë neve në përdorim dhe kemi nevojë për fondet buxhetore që ta kthejmë funksionale brenda vitit 2024. Vazhdojmë punojmë tej kapaciteteve, shumë persona në një zyrë dhe nuk plotësojë stafin sepse nuk kemi realisht ambiente ku të vendosim punonjësit tanë.”-tha Dumani.
