Meksika duket se nuk mund ta “kapërcejë” eliminimin nga Kupa e Botës dhe aq më tepër incidenti i ndodhur në dhomat e zhveshjes me Leo Messin, i cili u akuzua për mos-respektim të simboleve të shtetit pasi shkeli fanellën e tyre.
Deputetja e partisë ‘Morena’ që drejton vendin, Maria Clemente Garcia, propozoi të mërkurën në Dhomën e Deputetëve që Lionel Messi të shpallet “persona non grata” në Meksikë. Arsyetimi i Garcias bazohet në videon e rrjedhur në rrjetet sociale, ku Messi vendos këmbët në një fanellë të kombëtares meksikane në dyshemenë e dhomës së zhveshjes.
“Dhoma e Deputetëve të Kongresit të Meksikës i kërkon Ministrisë së Punëve të Jashtme të lëshojë deklaratën përkatëse, të shpallë personat “non grata” brenda territorit të Shteteve të Bashkuara të Meksikës, shtetas me kombësi argjentinase dhe spanjolle, Lionel Andres Messi Cuccitini, për shkak të mospërfilljes së tij të dukshme dhe mungesës së respektit për Meksikën, që u vu re gjatë Kupës së Botës të shtunën, 26 nëntor 2022”, thuhet në dokument.
