Futbollisti Klaus Gjasula është tërhequr nga Kombëtarja shqiptare pas pesë vitesh. Lajmin e ka bërë të ditur vetë mesfushori i cili shprehet se e ka plotësuar ëndrrën për të luajtur me Kombëtaren dhe se tani është koha për t’i hapur rrugën të rinjve.
“Jam menduar shumë kohët e fundit dhe me ftohtësi kam gjykuar e kam marrë vendimin për t’u tërhequr nga Kombëtarja. Është vendimi i duhur për t’u hapur rrugën të rinjve, që Kombëtarja jonë fatmirësisht ka shumë. Unë e realizova ëndrrën time dhe tani është koha për të tjerë që ta plotësojnë dhe ta jetojnë atë ëndërr”, shkruan Gjasula.
Gjasula, 34-vjeçar nga viti 2019 luajti 29 ndeshje për Shqipërinë, përfshirë edhe ndeshjen ndaj Kroacisë në Evropianin “Gjermania 2024”.
