Partia Demokratike shpreson të fitojë në tavolinë mandatin e Ilir Alimehmetit duke kërkuar hapjen e kutive.
Përfaqësuesi ligjor i PD në KQZ, Franci Nuri konfirmon se kërkesa për rinumërim do të fokusohet tek rivlerësimi i fletëve të pavlefshme të votimit.
“Rezultati është mjaft i ngushte ne lidhje me mandatin e 14-të/ Mandati është diskutim mes Partisë Demokratike dhe partisë së Agron Shehaj. Fletët e pavlefshme janë një opsion, nuk mund te anashkalohen, pasi janë rreth 17-18 mije fletë votimi te pavlefshme ne gjithë qarkun e Tiranës“ shprehet përfaqësues ligjor i PD.
Por, kali i betejës ligjore të demokratëve për ti hapur derën e Parlamentit Alimehmetit, i cili e humbi për një grusht votash shansin për të veshur xhaketën e ligjvënësit nuk janë vetëm fletët e pavlefshme.
“Opsioni tjetër është duke parë materialet zgjedhore për çdo qendër votimi ku ne gjykojmë se ka pasur probleme dhe nëse hiqet një qendër votimi nga përllogaritja e rezultatit aty mund te ndryshoje mandatin pasi diferenca ka qenë më pak se 100 vota“, tha Nuri.
