Shtetet e Bashkuara të Amerikës kryen një sulm të fuqishëm në Iran, duke përdorur armën e avancuar “bunker buster” për të goditur dhe shkatërruar tri objektiva bërthamore iraniane.
Çfarë është bunker buster?
“Bunker buster” është një bombë apo raketë e dizajnuar për të depërtuar në bunkerë, tunele dhe struktura të tjera të fortifikuara nën tokë, ku bombat e zakonshme nuk arrijnë të shkaktojnë dëme të mëdha. Ajo godet me shpejtësi të lartë dhe depërton dhjetëra metra nën tokë përpara se të shpërthejë, duke neutralizuar objektivin nga brenda.
GBU-57 Massive Ordnance Penetrator
Bomba GBU-57, e përdorur në këtë sulm, peshon rreth 13,600 kilogramë, është rreth 6.2 metra e gjatë dhe me diametër 80 cm. Ajo mund të mbartet vetëm nga bombarduesi B-2 Spirit.
Sipas Forcave Ajrore të SHBA-së, kjo bombë është projektuar për të goditur “armë masive të shkatërrimit të vendosura në objekte shumë të mbrojtura” dhe mund të depërtojë deri në 60 metra nën tokë para shpërthimit.
Sulmet dhe efektet
Sipas prezantimeve nga moderatorë dhe burime ushtarake, presidenti Donald Trump njoftoi se SHBA përdori gjashtë bomba bunker buster për sulmin në objektivin Fordow, dhe 30 raketa Tomahawk për të goditur objektivat në Natanz dhe Esfahan. Fordow është një prej objekteve kyçe të pasurimit të uraniumit në Iran, i vendosur thellë nën një mal dhe i vështirë për t’u goditur nga sulmet ajrore të zakonshme.
Ekspertë ushtarakë vlerësojnë se vetëm disa goditje me GBU-57 mund të shkatërrojnë plotësisht këto struktura të fortifikuara, gjë që e bën këtë sulm një përpjekje serioze për të dëmtuar kapacitetet bërthamore të Iranit.
