Ish-banorja e Big Brother VIP, Valbona Mhilli nga takimi i Ervin Salianjit me demokratët e Shkodrës, theksoi se ndryshimin në Partinë Demokratike nuk mund ta sjellin figurat e lodhura, por të rinjtë që kanë energji dhe vizion.
“Sot më shumë se kurrë, kjo parti ka nevojë për energjinë që ne, të rinjtë, mund t’ia japim. Situata e vendit është e rëndë: një shtet që po dobësohet çdo ditë nga pushteti i krimit dhe interesave të paligjshme, institucione të dobësuara, besim i thyer dhe shpresë e zbehur” tha Mhilli.
Anëtarja e FRPD-së theksoi se ndryshimi duhet të vijë nga të gjithë së bashku: “Nuk mund ta bëjnë ata që janë lodhur, por ata që ende besojnë, kanë shpresë dhe e duan PD-në. Detyra jonë është ta ngremë PD-në nga baza. Le të jemi brezi që nuk u dorëzua kurrë. Shqipëria ka nevojë për ndryshim, dhe le ta sjellim atë së bashku me PD-në”.
