Procesi i integrimit të Shqipërisë në Bashkimin Evropian ka ndikim të drejtpërdrejtë mbi bashkitë e vendit, të cilat do të duhet t’i nënshtrohen ndryshimeve të shumta dhe standardeve të reja.
Ministri i Pushtetit Vendor, Ervin Demo deklaroi se “po vjen një cunami“, duke nënvizuar nevojën për një transformim radikal të të gjitha institucioneve lokale për t’u përshtatur me kërkesat e integrimit.
“Në momentin që do të jemi vend anëtar i BE-së, procesi i integrimit kërkon detyrimisht një transformim radikal të të gjitha institucioneve. Një cunami është duke ardhur nga pikëpamja rregullative dhe e standardeve të reja që bashkitë duhet të plotësojnë“, tha Demo.
Ervin Demo theksoi gjithashtu se realiteti i ri kërkon energji dhe përgatitje nga çdo bashki: “Ato duhet të jenë të gatshme për të ngritur veten e tyre në një nivel tjetër, dhe ne do të jemi të gatshëm t’i ndihmojmë. Është një sfidë e përbashkët“.
Deklarata e tij nënvizon kompleksitetin dhe sfidat e pritshme gjatë procesit të integrimit në BE, veçanërisht për nivelin lokal të qeverisjes.
