Tritan Shehu u shpreh se Edi Rama ka rënë edhe moralisht edhe politikisht pas skandaleve qeveritare dhe gjendjes ku e ka çuar vendin, ndërsa foli për strategjinë e protestës opozitare ditën e nesërme para Kryeministrisë, çfarë pritet prej saj dhe projektin politik të PD-së.
Shehu nuk la jashtë analizës dhe komentit edhe garën për zgjedhjet në PD dhe atë për kreun e selisë blu, duke deklaruar se vota e tij do shkojë padyshim për Sali Berishën, sepse përveç tij askush tjetër nuk mund ta mbajë PD-në dhe ta sjellë në pushtet.
“Vota ime padyshim që më 23 maj do të jetë për Sali Berishën, ai ëhstë një figurë poliedrike, një simbol dhe drejtues. Votoj për të kushdo që të jetë përballë tij”, tha Shehu mes të tjerash.
“Sot shoh një PD që ka asete, trashëgime. Ti ke Berishën që është simbol. Në disa gjëra sot Berisha është më i pjekur, ndërsa për entuziazmin dhe shtirjen e reformave është i njëjti. Nuk shoh figurë tjetër që të ketë ato vlera që ka ai”.
I pyetur për çështjen e “non gratës” ndaj kryetarit të selisë blu, ai tha se Berisha ka kryer takime të ngjeshura politike jashtë vendit, si në Gjermani apo në Belgjikë dhe se ajo çështje konsiderohet e mbyllur, pasi u stis dhe krijua nga “Sorosianët dhe qeveria Rama”.
“Çështja e ‘Non gratës’ është e mbyllur. U stimulua nga kjo qeveri, nga Sorosianët dhe disa elemente nga PD. Ishte një komplot nga PD për t’i marrë drejtimin e PD. Sot ky komplot ka marrë goditjen e tij. Sot atmosfera dhe terreni demokratik është i vështirë se në ‘92. Sot është një regjim që rrezikon reformat. Sot PD është një parti e hapur, e bashkuar. Në politikë nuk ka 100% bashkim, ka dhe lëvizje e fraksione, hyrje dhe dalje”, tha ai.
Deputeti foli edhe për degradimin e qeverisjes, të rënë moralisht dhe si regjim. Por shtoi se “regjimet nuk rrëzohen me votë” por me protesta të vazhdueshme.
“Nuk na tremb kjo gjë. Sot ka gjetur një unifikim të madh, edhe të atyre që më parë kishin kontestim të fortë pasi kishin rënë pre e këtij komploti. Kishte dhe nga ata që u përdorën si pjesë e komplotit. Sot është parti që duhet të punojë më shumë, por është solide. Rama, po ta marrësh nga elementi moral, është i rrëzuar. Nga elementi i regjimit, e kam thënë më parë; regjimet nuk rrëzohen me votë, por me lëvizje popullore. Lëvizja popullore nuk është që të vijë Berisha në pushtet. Por të ndalohet regjimi dhe të bëhen zgjedhje të lira. Po nuk pati votë të lirë nuk ka alternativa”, u shpreh ligjvënësi opozitar.
Ish-ministri në qeverinë “Berisha” dhe drejtues i PD-së, shpjegoi se çfarë pret nga protesta kombëtare në ditën simbolike të demokracisë.
“Protesta e 22 marsit, është ditë historike. Pas 22 marsin nuk do të kishte ndryshime jo vetëm në Shqipëri, por dhe në Kosovë dhe Maqedoninë e Veriut. Mendoj se do të ketë lëvizje e pjesëmarrje”, tha ai.
