Në fjalën e mbajtur para SPAK, Berisha u pyet dhe në lidhje me përfshirjen e kryeministrit Rama te dosja “Partizani”, çështje për të cilën ka thënë se i gjithë faj rëndon mbi këtë të fundit.
Berisha shtoi më tej se Edi Rama ka zonuar zonën dhe ka dhënë lejet e ndërtimit në zonë, me përjashtim të dhëndrit të liderit demokrat, Jamarbër Mallteszi.
“Sepse Edi Rama një pjesë të mirë të klubit të Partizanit e kishte shndërruar në zonë urbane ndërtimi pa asnjë kërkesë të pronarëve, pa kërkesën e askujt. Ka qenë Olsi Rama që vendosi të bëhej miliardier në tokën e tjetrit. Edi Rama e ka zonuar atë në një kohë kur ajo nuk ishte kthyer pronarëve e nuk është bërë kërkesë për të. U tha se është Berisha ai që ka firmosur zonimin. Turp! Çfarë ndodhi prapa. Rama dha lejet e ndërtimit te klubi Partizani” tha Berisha para SPAK.
Ndërsa më tej Berisha pretendoi se kur Rama mori vesh se njëri prej pronarëve ishte dhëndri i liderit demokrat, Jamarbër Malltezi, ai bllokoi lejen e ndërtimit. Sipas Berishës gjykata për këtë veprim e ka gjobitur Ramën 320 mijë euro.
“Më vonë ai merr vesh se njëri nga pronarët ishte Jamarbër Malltezi. Edhe pse u dha leje, ky e mbante lejen e ndërtimit, nuk e zbardh. Gjykata e urdhëron ta zbardhë lejen e ndërtimit. Pas vendimit të gjykatës, pronarët vijojnë me punimin e zonës. Rama e bllokoi. Gjykata e ka dënuar me 320 mijë euro për dëmin” tha Berisha.
I pyetur se cila do të ishte lëvizja e tij, nëse i pranishëm në seancat gjyqësore për çështjen “Partizani” do tyë ishte dhe kryeministri Rama, Berisha u shpreh se do të merrte pjesë me kënaqësi në përballjen e tyre.
“Do të shkoj me kënaqësi. Le të vijë po të dojë. Po s’vjen ai, këta i shumëzon me zero. Po e thirrën unë shkoj patjetër” tha Berisha para SPAK.
Kujtojmë se më 2 prill, Avokatët e Berishës bdhe Malltezit kanë kërkuar që si dëshmitarë në këtë dosje, të thirret edhe kryeministri Edi Rama, kërkesë që mësohet se nuk është kundërshtuar nga Prokuroria e Posaçme.
Sipas mbrojtësve ligjorë të Berishës dhe Malltezit, është Rama që ka bërë ndryshimin e destinacionit të klubit sportiv Partizani në kohën kur ishte kryebashkiak i Tiranës, ndërsa theksojnë se për këtë çështje, kreu i qeverisë nuk është pyetur asnjëherë.
Ndërsa bëhet me dije se prokurorët e SPAK nuk e kundërshtuan kërkesën, por e lanë në dorë të gjykatës nëse Edi Rama do të japë dëshminë në çështje ku akuzohet rivali i tij kryesor politik.
