Kryeministri Edi Rama ka mbajtur mëngjesin e sotëm, episodin e radhës të podcastit të tij “Flasim”, ku ka ndarë fillimisht disa prej zhvillimeve më të rëndësishme të ditëve që lamë pas. Mes tyre edhe “debati” i vazhdueshëm me “Reporterë pa Kufij”, në lidhje me lirinë e medias në Shqipëri.
Rama solli në kujtesë, raportin që ai u “sugjeroi” të lexonin dhe të shohnin, një raport i ndërtuar sipas tij nga disa djemë shqiptarë me përdorimin e inteligjencës artificiale, dhe i gjithi vetëm me fakte empirike. Kujtojmë se sipas këtij raporti, theksohej se hapësira më e madhe mediatike i kalonte opozitës dhe qëndrimeve neutralle dhe më pak atyre pro-qeveritare, qofshin këto në median tradicionale apo online.
Rama ndër të tjera në podcast u shpreh se raporti që ai postoi: “ishte një pasqyrë që mua personalisht nuk më surprizon pasi unë dhe ne e dimë shumë mirë realitetin faktik të raportit mes medias dhe qeverisë dhe shumicës qeverisëse që nuk është gjëkundi realiteti i pretenduar nga ulëritësit që nuk dinë ç’të bëjnë tjetër me lirinë e medias, përveçse të ankohen për mungesën e lirisë, por që ishte një pasqyrë sipas meje e vlefshme për t’u ndarë me shumëkënd që do të informohet, me shumëkënd që është i interesuar për fakt dhe me shumëkënd që në të gjitha rastet nuk e humb respektin për faktet dhe nuk hyn në luftë me faktet se kur faktet provojnë një opinion të ndryshëm nga i tij apo i saj”
Duke shtuar më tej, Rama tha: “Kështu që thënë të gjitha këto unë kam një teori shumë të thjeshtë edhe për arsyen pse çdo përpjekje për të kapur mediat është një përpjekje që nuk të çon në fitoren e zemrave dhe të mendjeve të njerëzve dhe nga ana tjetër patjetër që duke i lënë të lirë të gjithë thonë ato që duan, njerëzit e kanë pastaj më të thjeshtë që të bëjnë dallimin mes atyre që bëjnë punët, atyre që përpiqen çdo ditë, atyre që edhe rrëzohen, por rrëzohen në një përpjekje për të ecur përpara dhe atyre që shtriqen nëpër kolltuk dhe ulërijnë nëpër gardhet e pakapërcyeshme të vetëvendosura nga mungesa e vizionit, nga mungesa e programit, mungesa e lidershipit, mungesa e shumëçkaje tjetër që karakterizon sot atë kamp në tërësi dhe nuk flasim vetëm për një parti, flasim për tërësinë.”
