Në Vlorë është zhvilluar një mbrëmje e veçantë kulturore kushtuar një prej figurave më të mëdha të muzikës shqiptare, Tefta Tashko Koço, e cila u rikthye simbolikisht në vëmendjen e publikut pas afro 90 vitesh përmes një podkasti skenik të konceptuar si një udhëtim artistik dhe emocional në jetën dhe veprën e saj.
Mes të ftuarve në këtë mbrëmje kulturore u vu re edhe prania e bashkëshortes së kryeministrit Edi Rama, Linda Rama, e cila kësaj here nuk ishte e shoqëruar nga kreu i qeverisë, por nga djali i saj, Zaho. I rritur tashmë, ai u shfaq përkrah së ëmës në këtë aktivitet artistik.
Podkasti skenik, i konceptuar si një rrëfim i gjallë artistik, solli në vëmendje trashëgiminë e vyer të Tefta Tashko-Koços, duke e rikthyer figurën e saj në qendër të kujtesës kulturore shqiptare përmes një formati bashkëkohor që ndërthurte narracionin me interpretimin muzikor.
Kjo mbrëmje e cila ishte ideuar nga Blerina Bodinaku, u vlerësua si një ndërthurje e suksesshme mes historisë, artit dhe kujtesës kulturore, duke i dhënë publikut një mënyrë të re për të përjetuar jetën e një prej zërave më të rëndësishëm të muzikës shqiptare.
