Prej 29 ditësh, vendi ynë është përfshirë nga protesta, të cilat fillimisht nisën për anulimin e projektit të Zvërnecit, ndërsa tani kërkohet dorëheqja e kryeministrit Edi Rama dhe e qeverisë së tij.
Disa prej anëtarëve të Grupit Koordinues të protestës kanë bërë thirrje për ngritjen e një Kuvendi Kombëtar Qytetar, i cili do të ketë edhe detyrën e krijimit të një qeverie teknike tranzitore. Sipas tyre, kjo qeveri do të duhet të zëvendësojë qeverinë e kryeministrit Rama pas dorëheqjes së tij.
Lajmin e ka bërë të ditur një nga 13 anëtarët e Grupit Koordinues të protestës, Përparim Gjeka, i cili ka zbuluar edhe tre institucionet kryesore të këtij Kuvendi, të cilat janë:
1-Kuvendi Kombëtar Qytetar
2-Këshilli Ekzekutiv i Kuvendit Kombëtar Qytetar
3-Mbledhja e Përgjithshme e Popullit Shqiptar.
Po ashtu Gjeka propozon që Kuvendi të prbëhet nga 150 anëtarë në përbërjen e tij të rregullt dhe deri në 300 anëtarë në përbërjen e zgjeruar, ku do të përfshihen edhe përfaqësues nga diaspora. Sipas projektit, ky organ do të ketë kompetencë të propozojë emrat e qeverisë teknike tranzitore dhe të koordinojë veprimet e protestëas.
Propozimi përfshin gjithashtu një sërë kriteresh për anëtarësimin në Kuvend, rregulla për funksionimin e tij dhe objektiva që lidhen me ndryshimin e sistemit politik dhe forcimin e rolit të qytetarëve në vendimmarrje.
Në postimin e tij, Gjeka u bëri thirrje qytetarëve që janë të interesuar të kandidojnë për anëtarë të Kuvendit Kombëtar Qytetar të kontaktojnë grupin organizues.
