Situata jashtë Komisariatit nr. 1 u tensionua, pasi protestuesit kundërshtuan praninë e deputetit të PD-së, Klevis Balliu, si dhe të Erald Kaprit nga Partia Mundësia dhe Redi Muçit nga Lëvizja Bashkë.
Mes thirrjeve si: “Kush je ti? Kë mbron? Ik! Shporru! Largohu!”, protestuesit u kërkuan tre përfaqësuesve politikë të largoheshin nga ambientet përpara komisariatit.
Ngjarja vjen pas protestës së zhvilluar më herët para Parlamentit, e cila u shoqërua me përplasje mes protestuesve dhe forcave të rendit. Gjatë tensioneve u përdorën gaz lotsjellës dhe ujë nga policia, ndërsa protestuesit hodhën vezë, gurë dhe sende të tjera të forta.
Sipas informacioneve paraprake, 20 persona janë shoqëruar në Komisariatin nr. 1, pasi dyshohet se sulmuan me vezë automjetet e deputetëve pranë Kuvendit.
Nga përplasjet raportohet se kanë mbetur të lënduar të paktën pesë qytetarë, ndërsa autoritetet nuk kanë dhënë ende një bilanc përfundimtar mbi incidentet.
