Ministri i Brendshëm, Besfort Lamallari ka prezantuar sot drejtorin e ri të Drejtorisë së Përgjithshme të Mbrojtjes nga Zjarri dhe Shpëtimi, Ervis Gjoshi, i cili do të ushtrojë detyrën e drejtuesit të komanduar të këtij institucioni.
Ai e merr këtë detyrë pas 18 vitesh karrierë në radhët e Policisë së Shtetit dhe sipas ministrit, rishikimi i kuadrit ligjor për MZSH dhe një program kombëtar për parandalimin e zjarrit mbeten prioritet për detyrën që i është besuar.
“Me një karrierë prej 18 vitesh në Policinë e Shtetit, me përvojë të gjatë në drejtimin e strukturave të sigurisë, si zëvendësdrejtor për Rendin dhe Sigurinë në DVP Tiranë dhe më herët si shef Komisariati në Dibër, ai sjell në këtë detyrë eksperiencën dhe përgjegjshmërinë e nevojshme për një strukturë kaq të rëndësishme. Rishikimi i kuadrit ligjor për MZSH dhe një program kombëtar për parandalimin e zjarrit mbeten prioritet për detyrën që i është besuar. Parandalimi është qëllimi madhor i qeverisë shqiptare dhe ajo çfarë presin më shumë qytetarët shqiptarë”, është shprehur ministri Besfort Lamallari.
