Adea Pirdeni ka reaguar pas betimit si Ministre për Administratën Publike, duke e cilësuar detyrën e re si një nder dhe përgjegjësi të shtuar.
Në reagimin e saj publik, ajo thekson se synon të vijojë reformën e meritokracisë dhe të vlerësimit të performancës në administratën publike, me qëllim përmirësimin e shërbimit ndaj qytetarëve.
Emërimi i saj vjen në një kohë kur kryeministri Edi Rama ka kërkuar dorëheqjen e drejtuesve të agjencive shtetërore në varësi të ministrive, ndërsa në një fazë të dytë pritet të analizohet performanca e tyre. Meritokracia dhe vlerësimi mbi bazën e rezultateve janë ndër parimet që qeveria ka deklaruar se synon të forcojë në administratë.
Përmes një postimi në kanalin zyrtar të MIA-s, Pirdeni shprehet: “Nder dhe përgjegjësi e shtuar të shërbej nga sot si Ministre për Administratën Publike, me përkushtimin për të thelluar reformën e meritokracisë dhe performancës për një administratë në shërbim të qytetarëve, siç e meriton Shqipëria evropiane, destinacioni final që na bashkon të gjithëve”.
