Shqiptaro-amerikani, Amadeo Oktrova ka shënuar një tjetër moment të rëndësishëm në karrierën e tij në Departamentin e Policisë së Nju Jorkut (NYPD), duke u promovuar në gradën e lartë “Deputy Inspector”.
Lajmi është bërë publik nga American Albanian Law Enforcement Association (AALEA), e cila e ka cilësuar promovimin e Oktrovës si një arritje të jashtëzakonshme dhe një moment krenarie për komunitetin shqiptaro-amerikan në Shtetet e Bashkuara.
Nga Tirana në New York, rrugëtimi i tij profesional është ndërtuar përmes viteve të shërbimit, përkushtimit dhe angazhimit në strukturat e zbatimit të ligjit.
Sipas AALEA-s, promovimi në gradën Deputy Inspector e vendos Oktrovën mes profesionistëve shqiptaro-amerikanë me arritje të rëndësishme në fushën e zbatimit të ligjit, ndërsa organizata vlerëson tek ai lidershipin, integritetin dhe përkushtimin ndaj shërbimit publik.
“Sot festojmë më shumë se një promovim. Festojmë fuqinë e trashëgimisë, shpërblimin e punës së palodhur dhe shembullin e një biri të Shqipërisë që ka arritur një nivel të jashtëzakonshëm suksesi, duke mbajtur me vete krenarinë për vendlindjen në çdo hap të rrugëtimit të tij,” thuhet në mesazhin e AALEA-s.
Organizata thekson gjithashtu simbolikën e rrugëtimit të tij nga Tirana drejt Nju Jorkut, duke e konsideruar historinë e Oktrovës një burim frymëzimi për shqiptaro-amerikanët dhe profesionistët e zbatimit të ligjit.
“Na bëre krenarë si komunitet. E bëre Shqipërinë krenare,” shkruan AALEA në urimin e saj, duke i dëshiruar Deputy Inspector Oktrovës suksese të mëtejshme dhe arritje të tjera në karrierë.
Promovimi i Amadeo Oktrovës përfaqëson një tjetër shembull të pranisë dhe kontributit të profesionistëve me origjinë shqiptare në institucionet amerikane.
“Nga Tirana në New York — trashëgimia frymëzon, shërbimi të ngre dhe ekselenca lë një gjurmë të qëndrueshme,” përfundon mesazhi i American Albanian Law Enforcement Association.
