Mbledhja e zhvilluar sot e kryeministrit Edi Rama me ministrat dhe drejtuesit politikë të qarqeve duket se nuk ka kaluar pa tensione. Siç raportojnë mediet në vend, i pari i qeverisë ka kërkuar nga ata të mos shfaqin asnjë formë mbështetje për Erion Veliajn.
Ai u ka bërë të qartë atyre se asnjë prej anëtarëve të qeverisë nuk duhet të mbajë qëndrim në favor të kryebashkiakut të Tiranës, qoftë edhe përmes deklaratave publike.
Pikërisht prej kësaj, është përmendur dhe rasti i Bledi Çuçit, ndërsa mesazhi i Ramës sipas informacionit të bërë publik, ka qenë i drejtpërdrejtë: “Askush nuk duhet ta mendojë dhe as të guxojë t’i bëhet krah apo mbështetje Erion Veliajt, qoftë kjo mbështetje direkt apo me deklarata publike”.
Në shënjestër të qëndrimeve të kryeministrit ka qenë edhe avokati i Veliajt, Plarent Ndreca. Ky i fundit është cilësuar nga Rama si një prej njerëzve që përfaqësojnë linjën e kryebashkiakut në kushtet kur ai nuk është i lirë. Ndërkohë kryeministri raportohet se e ka lidhur qëndrimin e tij ndaj Veliajt edhe me protestat duke e konsideruar atë si një faktor që mbështet zhvillimet kundër qeverisë.
