Botuesi i “Focus Group”, Irfan Hysenbelliu ka reaguar për herë të parë pas ndërprerjes së sinjalit të televizionit “News 24” dhe nxjerrjes nga ndërtesa e godinës shtetërore ku ka operuar prej vitesh të qindra punonjësve dhe gazetarëve të mediave që ka në pronësi.
Përmes një deklarate zyrtare, Hysenbelliu u ka kërkuar punonjësve të vet që të mos dorëzohen, teksa thekson se televizioni të cilin prej vitesh e drejton nuk do të mbyllet dhe se misioni i tyre do të vazhdojë.
“U drejtohem të gjithë punonjësve të News24: Mos u dorëzoni! Qëndroni të fortë, të qetë dhe krenarë për misionin tuaj. Ne kemi raportuar me ndershmëri, profesionalizëm dhe integritet – dhe nuk do të lejojmë që dhuna apo presioni ta shuajë zërin tonë. News24 nuk mbyllet. E vërteta nuk zhduket. News24 do vazhdoje te jete dritarja e së vërtetës, misioni ynë do vazhdojë! Ne nuk do të heshtim. Ne nuk do të tërhiqemi.”, shprehet në mesazhin e tij Hysenbelliu, teksa më tej u bën apel autoriteteve që të lejojnë gazetarët të rikthehen në vendin e tyre të punës.
