Pas temperaturave përvëluese të ditëve të fundit, moti në Shqipëri pritet të pësojë një freskim të ndjeshëm duke nisur nga dita e mërkurë.
Ndërkohë, përpos zonave të tjera të Ballkanit, gjatë mbrëmjes të së martës Shqipëria dhe Mali i Zi pritet të jenë ndër zonat më të ekspozuara ndaj një sistemi shumë të fuqishëm stuhish që vjen nga Italia përmes Detit Adriatik.
Ky sistem pritet të organizohet në formën e një bow echo (strukturë harkore stuhish), me potencial për të prodhuar erëra me forcë uraganike. Mbi Detin Adriatik, vrullshmëritë e erës lokalisht mund të arrijnë deri afër 180 km/h, ndërsa gjatë afrimit drejt bregdetit dhe depërtimit në territorin e Shqipërisë, veçanërisht në zonat veriore dhe qendrore të vendit, priten vrullshmëri shumë të fuqishme deri rreth 150 km/h.
Sistemi pritet të vazhdojë më tej drejt Maqedonisë së Veriut dhe Greqisë, me tendencë graduale të dobësimit gjatë avancimit. Zonat jugore të Shqipërisë pritet të jenë më pak të prekura dhe me intensitet më të dobët.
Përveç erërave ekstreme, priten edhe breshër shumë i madh deri në 8 cm, reshje intensive në një kohë të shkurtër dhe shkarkesa të fuqishme rrufesh. Në kushtet e favorshme atmosferike, nuk përjashtohet edhe mundësia për tornado të izoluara, veçanërisht në zonat ku do të zhvillohen superqeliza.
Erërat deri në 150 km/h nga (bow echo) mund të shkaktojnë dëmtime të rënda, përfshirë rrëzim pemësh, dëmtime në çati, sera dhe struktura të lehta. Mund të ketë dëmtime në infrastrukturën elektrike dhe rrezik nga objektet e pafiksuara që mund të fluturojnë.
Reshjet intensive në një kohë të shkurtër mund të shkaktojnë gjithashtu përmbytje lokale, veçanërisht në zonat urbane, ultësira dhe vendet me drenazh të dobët. Gjatë kalimit të këtij sistemi, kushtet mund të përkeqësohen shumë shpejt. Rekomandohet kujdes i shtuar.
