Të gjithë fermerët që kanë një NIPT do të përfitojnë nga skema kombëtare për bujqësinë. Deri në mesditën e 21 marsit që shënon dhe ditën e dytë të thirrjes për mbështetje, gjithsej kanë aplikuar 17 mijë fermerë duke filluar nga bujqësia, blegtoria e deri tek peshkimi.
Ka një interesim të lartë që fermerët shqiptarë kanë treguar për naftën FALAS, ku deri më tani 41% aplikimeve janë bërë nga bujqit për të përfituar naftën pa taksa. Zv ministri i bujqësisë, Dhimo Kote thotë se deri në mbrëmje kjo shifër pritet të dyfishohet.
“Aplikimi filloi që ditën e djeshme dhe ka arritur 17 mijë aplikime, ku vetëm 7200 janë vetëm për naftën, ndërsa 10 mijë janë për masat e tjera. Pra kjo tregon që fermerët tanë mund të aplikojnë edhe në portalin e-Albania. Kjo është një shifër që edhe ne na surprizoi pasi ishte jashtë çdo parashikimi“, shprehet Kote. Nëse bëjmë një krahasim në rang qarqesh, fermerët e zonës së Korçës janë të parët në renditje për nga numri i aplikimeve, duke lënë pas kështu zonat bujqësore të Lushnjës dhe Fierit.
