Qeveria Rama ka reaguar pas lajmeve se do të shkurtohet orari i punës për punonjësit e administratës shtetërore.
Sipas sqarimit të qeverisë, nuk kemi të bëjmë me reduktim të orarit për shkak të të “nxehtit afrikan”, por ndryshimi lidhet me një VKM për rregullat e reja të kohëzgjatjes në punë, duke përfshirë konceptin e orarit ditor fleksibël për çdo punonjës të administratës .
Kështu, propozimi në fjalë parashikon që punonjësi mund të zgjedhë një orar pune fleksibël duke respektuar gjatë 4 ditëve të javës kohëzgjatjen prej 8 orë e 30 minuta nga e hëna e deri të enjten, ndërsa të premten orari i punës zbret në 6 orë.
Fasha e detyrueshme orare kur të gjithë nëpunësit duhet të jenë në vendet e tyre të punës, nga e hëna në të enjte të jetë 9:30 deri në 15:30, ndërsa ditën e premte nga ora 9:30 deri në 13:00.
Qeveria Rama bën të ditur se kjo iniciativë vjen si përgjigje për të përmirësuar fleksibilitetin dhe efikasitetin në administratën publike, duke reflektuar nevojat e punonjësve për një orar më të përshtatshëm dhe një balancim më të mirë të jetës dhe punës.
