Kryeministri Edi Rama njoftoi se për pak ditë Partia Socialiste do të dalë në terren dhe do të zhvillojë takime me qytetarët e Shqipërisë në kuadër të fushatës elektorale të “11 majit”.
Edi Rama foli me bindje se edhe këtë herë PS do të fitojë bindshëm ku premtoi se e gjithë Shqipëria do të marrë ngjyrë mavi.
“Për pak ditë, për pak kohë, akoma s’e kemi caktuar datën, fillojmë maratonën ‘’Sy m’sy’’. Maratona “Sy m’sy’’ është kudo, është këtu, është atje, është andej, është në fshat, është në qytet, është në rrugë, është në kafe, në majë të malit, është buzë detit, është buzë lumit, do jetë e bukur shumë. Do jetë shumë e bukur maratona drejt 11 majit dhe do kemi edhe atë argëtimin përkatës patjetër, se janë ca që thonë “ça do nxjerrësh këtë herë’’, se një herë me tepsi, një herë me tallava, një herë më kështu e një herë me ashtu. Do ta tundim dhe do kemi një fitore spektakolare edhe do t’i japim një mësim shembullor shumëkujt. Shumëkujt do t’i japim një mësim shembullor, por gjithmonë jo për të marrë hak me askënd, po për të bërë një Shqipëri më të mirë dhe për ta çuar atë flamurin e Skënderbeut dhe të Ismail Qemalit atje në rreshtin e 27 vendeve të Bashkimit Europian“, tha Rama/ Rilindje.info
