Kryetari i PAA, Agron Duka deklaroi se opozita po ndjek një strategji të mirëpërcaktuar për zgjedhjet e 11 majit, duke përfshirë edhe ekspertizën e strategut elektoral amerikan Chris LaCivita.
Duka, i cili është pjesë e koalicionit të gjerë opozitar me Partinë Demokratike në krye, tha se nuk ka pasur kontakte të drejtpërdrejta me LaCivitën përveç një takimi prezantues, por vijon të ndjekë linjat që vijnë përmes PD-së dhe që sipas tij janë të orientuara nga strategu amerikan.
“Unë e kam takuar LaCivitën një herë, gjatë prezantimit të tij. Ai u prezantua si strateg elektoral. Nuk kam pasur ndonjë kontakt të drejtpërdrejtë me të, por përmes PD-së kemi marrë orientime për linjat që duhet të ndjekim në fushatë. Besoj se njohuritë dhe informacionet që LaCivita ka marrë përmes PD-së kanë ndikuar në orientimin e saj drejt krijimit të një koalicioni sa më të gjerë. Kjo është në përputhje me objektivin tonë për të fituar zgjedhjet” tha Duka.
