Ditën e sotme Shqipëria do të jetë nën “pushtetin” e reshjeve të shiut të cilat pritet të jenë prezentë në veriperëndim e gradualisht do të shtrihen edhe në pjesën tjetër të vendit.
Reshjet pritet të jenë të përqëndruara në veriperëndim me intensitet deri të lartë, hera-herës shtrëngata shoqëruar me shkarkesa elektrike.
Sipas Agjencisë së Mbrojtjes Civile, Shkodra dhe Lezha janë dy qarqet më të rrezikuara për përmbytje pasi në këto zona do të kemi reshje me intensitet të lartë.
“Në bazë të parashikimit të Shërbimit Meteorologjik Ushtarak në orët në vijim pritet të ketë reshje me intensitet mesatar në qarqet Shkodër dhe Lezhë. Ministria e Mbrojtjes, në bashkëpunim me Agjencinë Kombëtare të Mbrojtjes Civile, po vijon koordinimin me autoritetet vendore për marrjen e masave të nevojshme në rast emergjence. Gjithashtu, i bëjmë thirrje qytetarëve të tregojnë kujdes të shtuar dhe të bashkëpunojnë me autoritetet për çdo rast nevoje”, njoftoi Agjencia e Mbrojtjes Civile.
