Kryeministri Edi Rama ka dhënë një intervistë për median italiane “La Stampa”, ku ka folur në lidhje me ecurinë e sezonit turistik në vendin tonë.
Rama ka deklaruar se Shqipëria tashmë ka barazuar Greqinë dhe ka kaluar Italinë për numrin e turistëve që ka pritur.
Ndërkohë që kryeministri Edi Rama po pushon, vetëm pak ditë, në shtëpinë e tij të pushimit në Dhërmi, aeroporti i kryeqytetit shqiptar nuk fle kurrë. 200 fluturime nga muzgu në agim, pa llogaritur transportin tokësor apo detar.
“Ne po ecim në gjurmët që ka përshkuar vendi juaj (Italia). Por kjo verë ka qenë përtej pritshmërive. Kemi pasur një rritje prej 35 për qind të turistëve, shifrat e italianëve janë mbresëlënëse dhe janë afër gjysmë milioni. Në fillim të mandatit tim (2013), aeroporti i Tiranës trajtonte maksimumi 350 mijë kalime në vit. Tani mbi 6.5 milionë”, tha Rama.
“Ne kemi barazuar Greqinë dhe sapo kemi kaluar Italinë për numrin e turistëve për frymë. E pabesueshme, por ne kemi punuar shumë për të në këto vite të Rilindjes Shqiptare”, shtoi Rama.
