Sekretari i Përgjithshëm i Partisë Demokratike, Flamur Noka, ka deklaruar se vendi ndodhet në “kilometrin e fundit” përballë asaj që ai e cilëson si narkoregjim.
Noka tha se Shqipëria nuk qeveriset më nga institucionet, por nga kartelet kriminale, ndërsa vota e lirë, sipas tij, është asgjësuar.
“Hap rrugën një zgjidhjeje politike, ndryshe fundi do jetë i shpejtë”, u shpreh Noka, duke paralajmëruar protesta të vazhdueshme deri në rrëzimin e qeverisë.
Noka theksoi se beteja e opozitës nuk ka si synim ardhjen e PD-së në pushtet, por largimin e qeverisë aktuale dhe krijimin e një qeverie tranzitore ose teknike, me mision të vetëm garantimin e zgjedhjeve të lira dhe të ndershme.
Ai foli për “mllef të paprecedentë” në shoqëri, duke shtuar se shqiptarët ndihen të vjedhur dhe të nëpërkëmbur, ndërsa emigrimi dhe pasiguria janë pasojë direkte e kapjes së shtetit nga krimi.
“Shqipëria sot është narkoshtet”, deklaroi Noka, duke përmendur raste konkrete të ndikimit të bandave në institucione dhe zgjedhje.
Sipas tij, vetëm një reagim i gjerë shoqëror mund të çojë në rikthimin e demokracisë dhe votës së lirë.
