Në 4 vite të periudhës 2019-2022 nga nisja e programit mbështetës për dhënien e bonusit të bebeve, është shpenzuar nga buxheti i shtetit fondi me vlerë 11.5 miliardë lekë.
Për shkak të numrit të lartë të bebeve përfituese jashtë Shqipërisë, Ministria e Shëndetësisë dhe Mirëqenies Sociale ka hedhur për konsultim publik ndryshimin ligjor, që i përjashton emigrantët nga bonusi i bebes.
Qeveria i mbështet familjet nëpërmjet dhënies direkte të çekut me vlerën e 40 mijë lekëve për fëmijën e parë, 80 mijë lekë për fëmijën e dytë dhe 120 mijë lekë për fëmijën e tretë. Bonusi deri më tani përfitohet për të gjithë fëmijët e regjistruar në Shqipëri, edhe nëse foshnja ka lindur jashtë shtetit, në formën e çekut që tërhiqet nga nëna.
Nëse ligji i hedhur për konsultim do të miratohet në Parlament, atëherë emigrantët nuk do ta përfitojnë më këtë bonus.
