Analisti Poli Hoxha thotë se duke parë veprimet e Sali Berishës, i cili së fundmi ka thirrur protestë ditën e sotme kur dhe do të mbahet gjyqi për PD-në, vula do t’i kalojë Enkelejd Alibeajt.
Në një intervistë për Euronews Albania, Hoxha u shpreh se Apeli do ta zhbëjë vendimin e gjyqtarit Agron Zhukri, i cili njohu Statutin e dalë nga Kuvendi i 11 Dhjetorit 2021.
“Berisha ka informacion sidomos në sistemin e drejtësisë, thirrjen e protestës atë ditë, pavarësisht se ai tha nuk e kam kundër drejtësisë, është gënjeshtër. Po të shikosh thirrjen për protestë, thuhet në një nga pikat që po kërkojnë të na rrëmbejnë legjitimitetin. Edhe nga informacionet që kam e duke u konsultuar me juristët, ka shumë shkelje proceduriale dhe falsifikime ndoshta. Por mënyra sesi do veprojë Gjykata e Apelit, ose do e kalojë direkt te Alibeaj, por më e mundshmja është që ta zhbëjë Zhukrin dhe të kalojë te Shkalla e Parë për një hetim procedurial”, theksoi Poli Hoxha.
