Ish-kapiteni i Kombëtares, Altin Lala ka bërë një analizë të ndeshjes mes Shqipërisë e Italisë në Euro 2024.
Lala tha se një nga shkaqet kryesore të humbjes është tërheqja e ekipit kombëtar më shumë se ç’duhet, pas golit të parë të Bajramit.
Lala tha se është e vështirë që duke qëndruar vetëm në mbrojtje t’i rezistosh një ekipi si Italia, e cila është një ndër skuadrat më të mira në botë.
“Ishte një festë e jashtëzakonshme, unë kam luajtur për fat në Gjermani, edhe në Dortmund, ku në ndeshjet e Bundesligës në stadium janë 80 mijë shikues. Por kjo atmosferë pas golit, ne praktikisht filluam lojën me 1-0. Pas 23 sekondash shënuam, ishte një atmosferë e jashtëzakonshme. Njerëzit që ishin në stadium kanë qenë të eksituar. Por mendimi im është se ne filluam të tërhiqeshim jashtë mase shumë, nuk reaguam ashtu siç duhej. Natyrisht 1-0 ishin akoma 90 minuta të luaje dhe ishte gabim nga ana taktike që të tërhiqeshe aq shumë dhe pothuajse se përveç Brojës ishin gjithë lojtarët para 16-shës. Kështu nuk mundesh të rezistosh 90 minuta par Italisë, që megjithëse thuhet se nuk ka shumë emra të mëdhenj, është një Kombëtare me histori që hyn te më të mirat në botë për mendimin tim”, tha Lala.
