Ambasadori italian në Shqipëri, Marko Alberti, ishte i pranishëm gjatë ditës së sotme në qytetin e Korçës.
Ambasadori u pyet nga gazetarët edhe në lidhje me situatën politike dhe atë të drejtësisë, të cilat kanë pasur zhvillime të forta gjatë ditëve të fundit.
Sa i përket pyetjeve mbi masën e “arrestit shtëpiak” ndaj ish-drejtueses së SHISH, Vlora Hyseni, Alberti tha se nuk kishte asnjë koment.
“Atëherë, unë nuk mund t’ju jap asnjë përgjigje lidhur me këtë, sepse ne merremi, pra trajtojmë çështjet e bashkëpunimit dypalësh dhe nuk mund të kem asnjë mendim lidhur me këtë që po më pyesni”, tha Alberti.
Lidhur me protestat e zhvilluara prej 117 ditësh në Tiranë, qytete të tjera të vendit, si dhe në diasporë, kundër qeverisë Rama, Alberti tha se situata po ndiqet me vëmendje dhe se Italia respekton atë që po ndodh.
“Atëherë, ne i ndjekim me vëmendje protestat. Sigurisht që nuk i përket, nuk është detyrë e një ambasadori që përfaqëson një shtet të caktuar, të shprehet apo të prononcohet për këtë. Ne jemi duke e ndjekur situatën dhe respektojmë çfarë ndodh”, u shpreh ambasadori.
