Gjykata e Strasburgut i ka dhënë të drejtë Fredi Belerit duke vlerësuar se argumentet e shtetit shqiptar për paraburgimin e tij nuk kanë qenë të mjaftueshme për ta mbajtur atë në qeli.
Përmes një vendimi të marrë më 10 nëntor të 2026, Strasburgu nënvizon se paraburgimi filliestar i Belerit ishte i justifikuar dhe për rastin në fjalë nuk janë konstatuar shkelje. Mirëpo në vijim të paraburgimit të Belerit, Gjykata nënvizon se nga shteti shqiptar duhej të kishte shqyrtuar nëse Beleri do të mbahej në paraburgim ose nëse do të ishte e mundur që të zbutej masa e sigurisë ndaj tij.
Në vendimin e marrë sot, Strasburgu nënvizon faktin se periudha e paraburgimit të Belerit ka zgjatur 9 muaj dhe 21 ditë. Mirëpo nga pala e gjykatës shqiptare është caktuar që Beleri të qëndrojë në paraburgim me argumentimin se ai rrezikon të zhduket ose të përsërisë veprën penale.
Ndërkohë nuk është marrë për bazë se sa kohë duhet për përfundimin e hetimeve dhe faktin se aktakuza ishte ngritur, si dhe nuk kishin identifikuar prova konkrete që mund të rrezikoheshin nga ndërhyrja e Belerit. Po ashtu, nuk ishin vlerësuar në mënyrë të mjaftueshme lidhjet e tij familjare dhe ekonomike me Himarën, ku jetonte familja e tij dhe ku kishte aktivitet tregtar.
Sipas Gjykatës, ato nuk mund të kufizoheshin vetëm te argumenti se çështjet ishin shqyrtuar më parë, por duhej të vlerësonin në çdo fazë nëse arsyet për privimin e lirisë vazhdonin të ishin të vlefshme.
Në përfundim të vendimit të tyre, “Strasburgu” vendosi që shteti shqiptar t’i paguajë Fredi Belerit 450 euro për dëmin jopasuror dhe 5 mijë euro për kostot dhe shpenzimet gjyqësore. Gjykata rrëzoi kërkesën e tij për dëmshpërblim për humbjen e të ardhurave që pretendonte se kishte pësuar për shkak se nuk mundi të ushtronte detyrën e kryetarit të Bashkisë së Himarës.
