Lajme të mira vijnë nga bursa ndërkombëtare pasi bie çmimi i karburanteve. Një fuçi nafte po tregtohet në bursë me 74 Dollarë, nga 82 Dollarë që ishte në fund të muajit Maj. Ekspertët e konsiderojnë Rënie historike të çmimit që prej fundit të vitit të kaluar.
Sipas mediave ndërkombëtare, kjo ulje erdhi pasi OPEC (organizata e vendeve eksportuese të naftës) njoftoi se do të fillojnë të heqin gradualisht kufizimet për prodhimin e naftës përgjatë 12 muajve, duke nisur nga Tetori 2024.
Çmimet e ulura në bursa kanë nisur të reflektohen edhe në tregun vendas, ku sipas të dhënave nga Drejtoria e Përgjithshme e Doganave, në fund të muajit që lamë pas nafta është blerë me 752 $/ton.
Aktualisht në Shqipëri një litër naftë po tregtohet me çmimin 184 Lekë, benzina me 183 Lekë, ndërsa gazi me 59 Lekë/litri.
