Ditën e dielë pritet të shënohet edhe dita më e nxehtë e kësaj jave, duke sjellë temperatura ekstreme në disa qytete të vendit.
Sinoptikania Lajda Porja, bëri me dije se qarku i Shkodrës do të arrijë vlerën rekord prej 39 gradë Celcius, ndërsa Elbasani, Berati dhe Gjirokastra do të shënojnë 38 gradë.
Qytetet e tjera të ultësirës perëndimore do të variojnë mes 36 dhe 37 gradë, ndërsa bregdeti do të shijojë temperatura të ngrohta nga 33 deri në 35 gradë.
Tirana, ndonëse nuk do të ketë reshje, do të përballet me vranësira dhe lagështirë të lartë gjatë fundjavës, duke bërë që i nxehti të ndihet deri në 40 gradë. Për të gjithë ata që kanë planifikuar pushimet në fund të gushtit apo në fillim të shtatorit, lajmet janë të shkëlqyera.
Porja theksoi se muaji shtator do të nisë me temperatura shumë të larta, duke shkuar deri në 35 gradë në zonat e ultësirës perëndimore, dukshëm mbi normat e zakonshme prej 28-29 gradësh. Këto kushte klimaterike, me tipare tipike të verës, do ta bëjnë shtatorin një muaj ideal për të vijuar plazhin në vijën bregdetare pa asnjë shqetësim.
