Deputeti socialist Erion Braçe ka bërë një vëzhgim në një treg fruta perimesh në Tiranë në njësinë 5 pranë shkollës Vasil Shanto.
Braçe vëren se “çmimet janë çmendur” dhe duhet ndërhyrë për një situatë që ai e ka paralajmëruar dhe më herët që pas përmbytjeve në vend, 2 muaj më parë.
“Për ushqimin, perimet dhe frutat: Tek trotuari nga shkolla “Vasil Shanto” e poshtë, ka disa pika të shitjes së perimeve dhe frutave. I pashë tani, çmimet janë çmendur! Dhe këto pika mbahen si më të lirat tek 5 Maji. Domatet fillojnë me 300 lekë dhe arrijnë deri në 340 lekë për kilogram. Domatet e vogla, të huaja doemos, janë 640 lekë për kilogram. Speci i kuq ka arritur në 340 lekë për kilogram. Karrota ka arritur në 140 dhe shkon edhe 150 lekë për kilogram. Patëllxhani, edhe pa cilësi, ka arritur në 320 lekë për kilogram.
Bizelet kanë arritur në 480 lekë për kilogram. Mashurkat kanë arritur në 600 lekë për kilogram. Domethënë, keq! Abuzim është skandaloz, për më tepër kur këto lekë i marrin edhe pa faturë tatimore. Dhe po e përsëris, këto pika mbahen si më të lirat në Tiranë. Ndërkohë, kam një vit që i kërkoj Policisë së Bashkisë të lirojë gjysmën e trotuarit që u merret të moshuarve që lëvizin këtu dhe që grabiten me këto çmime, por mesa duket Policia e Bashkisë ka gjetur mirëkuptim me çdokënd këtu. I bie shkurt: inate komshinjsh!”, shkruan Braçe.
