Në emisionin “Opinion” në Tv Klan, biznesmeni shqiptar Gjergj Luca, ka treguar një histori delikate nga adoleshenca e tij pasi ka rrezikuar të përfundojë në burg.
Blendi Fevziu: Çfarë vodhe?
Gjergj Luca: “Kishim marrë, kishim bërë ca barake, kishim thyer lekët, na kapin…. Unë isha duke luajtur bixhoz dhe vjen babai me merr per krahu, kupton, se hera e parë që merr, se i ikja prej shtëpie që 14 vjeç, gjuaja peshk, kam qenë shpirt i lirë. Më merr më çon rrugës për tek Mine Peza dhe më thotë rrugës: “Dëgjo, po të çoj në një vend ku çohen burrat. Po të çoj në një vend ku sot do të ndahet karakteri jot. Po të çoj në një vend që ti o do vdesësh e do vazhdosh burrë, o do vazhdosh legen dhe do vdesësh legen”. I thashë: “Babë si është puna?”. “Ti”, më tha “ndaç pranoje para meje, ndaç mos i prano, mua më kanë thënë për respekt që shokët e tu t’i kanë arrestuar, që ti ke bërë disa veprime. Tani po të çoj në një vend që unë dua që ti t’i rrish fjalës së parë. Ty do të të nxjerrin të gjitha deklaratat e këtyre, se çfarë kanë bërë që ke qenë edhe ti. Tani, në rast se ti do t’i pranosh, siç i kanë pranuar të gjithë ata, nuk ka asnjë lloj problemi. Në rast se ti nuk i pranon, ata do të të rrahin dhe po i pranove mbrapa ti ke për të qenë legen. Kështu që ndaje mendjen, unë nuk të them as pranoje, as mos i prano. I ke bërë turp ta kesh”. Shkoj brenda atje, futem tek 326-a , ishte Doloreza prokurore. Mi nxjerrë të gjitha deklaratat, ulem, i lexova fije për pe se çfarë kishim bërë ne.”
