Kryeministri Edi Rama ka dhënë lajmin e mirë se në Shqipëri më datë 6 dhjetor do të mbahet për herë të parë në histori tëvendit Samit i Bashkimit Europian me Ballkanin Perëndimor.
Rama shkruan se me propozim të kancelarit gjerman Scholz Shqipërisë i është dhënë kryesimi i Procesit të Berlinit dhe organizimi në Tiranë i samitit të ardhshëm. Sipas Ramës, kjo tregon respektin që Shqipëria ka fituar ndërkombëtarisht.
“Sot Shqipërisë iu dha me propozim të kancelarit Scholz, kryesimi i Procesit të Berlinit dhe organizimi në Tiranë i Samitit të ardhshëm. Më 6 dhjetor në Shqipëri do të mbahet i pari Samit i Bashkimit Europian me Ballkanin Perëndimor në rajonin tonë. Këto ngjarje të mëdha ndërkombëtare të pandodhura kurrë më parë në Shqipëri, të paimagjinueshme deri disa kohë më parë për t’iu besuar një qeverie të Shqipërisë, janë domethënëse për shkallën e respektit që Shqipëria ka fituar ndërkombëtarisht”, shkruan Rama.
