Nga ambientet jashtë Bllokut të Sigurisë te Mine Peza, aty ku ndodhen 11 protestuesit e arrestuar pas protestës së mbrëmjes së kaluar, deputeti demokrat Klevis Balliu ka folur për mediat, disa orë pasi ai dhe kolegë të tij u paraqitën në spital pas përplasjes me policinë gjatë protestës.
Balliu deklaroi se ajo që ndodhi gjatë ndërhyrjes së policisë përbën një nga aktet më të rënda të dhunës të regjistruara ndonjëherë në një tubim proteste.
Ai pretendoi se protestuesit dhe deputetët e opozitës janë goditur me shkopinj gome dhe me spraj lotsjellës, të cilin e cilësoi si substancë të ngjashme me atë që përdoret kundër kafshëve të egra.
“Duhet të bëhet testi i drogës për efektivët e policisë që marrin pjesë në këto tubime. Është një nga aktet më kriminale të para ndonjëherë. Dhuna ndaj qytetarëve dhe deputetëve që janë goditur me shkopinj gome. Janë goditur me spraj që përdoret për arinjtë, i kombinuar edhe me lëndë të tjera si gazi lotsjellës. Këto janë operacione të helmit politik të Partisë Socialiste. Ajo ndërhyrje do të marrë përgjigjen që meriton. Do të kemi zero mëshirë për kriminelët që kanë dhunuar mbrëmë”, u shpreh Balliu.
