Një artikull i publikuar në “Financial Times” ku gazetari Marton Dunai interviston kryeministrin Rama, ka shkaktuar një sërë komentesh negative.
Komentet dhe kritikat i adresohen deklaratës së Ramës në intervistë, sipas së cilës “Kosova është një pikë e nxehtë dhe me kalimin e viteve është bërë një tokë e askujt ku kombinohen të gjitha llojet e krimeve”, është korrigjuar nga autori i shkrimit.
Por përmes një reagimi, gazetari Dunai pranon se ka pasur një gabim në shkrimin e tij i cili është korrigjuar. Gazetari sqaron se Kryeministri në fjalën e tij i referohet veriut të Kosovës dhe jo shtetit të Kosovës.
“E kemi ndryshuar këtë artikull për të sqaruar se kryeministri shqiptar po diskutonte problemet në veri të Kosovës, jo në të gjithë vendin”, shkruan gazetari i Financial Times, Marton Dunai.
Në artikullin e Financial Times, Rama ka përsëritur kërkesën për rivendosjen e kontrollit të veriut të Kosovës nga ana e NATO-s.
