Bashkia Gjirokastër ka thyer heshtjen dhe ka reaguar për herë të parë lidhur me lajmet që po qarkullojnë gjatë 24 orëve të fundit, ku është aluduar se kryebashkiaku Flamur Golemi si dhe 18 punonjës të institucionit që ai drejton janë infektuar me virusin HIV/AIDS.
Përmes një reagimi zyrtar, Bashkia e Gjirokastrës i ka hedhur poshtë kategorikisht këto pretendime, duke i cilësuar të pavërteta, të fabrikuara dhe pa asnjë bazë faktike. Sipas institucionit, përhapja e tyre synon të krijojë panik dhe pasiguri te qytetarët, si dhe të dëmtojë figurën e bashkisë dhe të drejtuesve të saj.
“Bashkia Gjirokastër dënon me forcën më të madhe përhapjen në rrjetet sociale dhe në çdo formë tjetër publike të informatave dhe pretendimeve të rreme, të fabrikuara dhe alarmuese, të cilat kanë për qëllim të qartë krijimin e një gjendjeje pasigurie dhe paniku te qytetarët. Pretendimet e shpërndara së fundmi, sipas të cilave Kryetari i Bashkisë dhe 18 punonjës të këtij institucioni rezultojnë të infektuar me virusin HIV/AIDS, janë tërësisht të pavërteta, të sajuara dhe pa asnjë bazë faktike apo reale”, thuhet në reagimin e Bashkisë.
Teksa e konsideruar më tej këtë rast si një akt të rëndë dezinformomi, Bashkia e Gjirokastrës ka kërkuar që organet ligjzbatuese të nisin menjëherë hetimet për identifikimin e autorëve dhe shpërndarësve të lajmit të rremë.
