Kryeministri Edi Rama ka paralajmëruar se shembja e objekteve të paligjshme është një proces i vazhdueshëm që nuk do të ndalet, derisa të eliminohet plotësisht ky fenomen.
Rama thekson se ky proces do të shoqërohet në ditët në vijim me një paketë të re masash ligjore.
“Shembja e objekteve të paligjshme, e cila ka nisur kudo, nuk është një aksion, po një proces që jo vetëm s’do të ndalet deri në eliminimin e këtij fenomeni, por edhe do të shoqërohet ditët në vijim me paketën e re të masave për tkurrjen e këtij fenomeni, duke rritur forcën goditëse të ligjit mbi fajtorët dhe personat përgjegjës të nivele të ndryshme, përfshirë edhe ‘symbyllurit’ në inspektoriate, polici e me radhë”, shkruan Rama.
Kryeministri Rama është shprehur i vendosur për të luftuar ndërtimet pa leje, që kanë qenë një problem i madh në Shqipëri, duke dëmtuar jo vetëm mjedisin por edhe rendin urbanistik dhe investimet e ligjshme. Ai madje ka paralajmëruar edhe ndryshime në Ligjin për ndërtimet.
