Besart Xhaferri ka njoftuar mbrëmjen e sotme në rrjetet sociale përfundimin e detyrës së tij si kryetar i Forumit Rinor të Partisë Demokratike (FRPD), pas katër vitesh në drejtimin e strukturës rinore.
Përmes një postimi në Facebook, ai ka bërë të ditur se FRPD do të nisë një proces të ri organizimi dhe ripërtëritjeje të strukturave në të gjithë vendin. Drejtimi tranzicional i Forumit Rinor do t’i kalojë Sekretarit të Përgjithshëm, Fatjon Bathorja, i cili do të drejtojë edhe grupin e punës përgjegjës për organizimin e këtij procesi.
Po ashtu në postim Xhaferri ka falenderuar Sali Berishën, Flamur Nokën, Belind Këlliçin, si dhe drejtuesit politikë të qarqeve dhe të gjithë antarët e PD-së për bashkëpunimin e shkëlqyer gjatë këtyre katër viteve.
“Një falenderim të veçantë dhe të sinqertë dua t’i shpreh Kryetarit të Partisë Demokratike, Prof. Dr. Sali Berisha, Sekretarit të Përgjithshëm, z. Flamur Noka, paraardhësit dhe ish Kryetarin e FRPD z. Belind Këlliçi, drejtuesve politikë të qarqeve dhe të gjithë anëtarëve të Kryesisë së Partisë Demokratike, për bashkëpunimin e shkëlqyer gjatë këtyre katër viteve,” thekson ai.
Xhaferri theksoi se largimi nga drejtimi i Forumit Rinor nuk nënkupton largimin nga Partia Demokratike apo nga angazhimi politik, duke nënvizuar se do të vijojë të jetë pjesë e kësaj familjeje politike.
“Sot largohem nga drejtimi i FRPD-së, por jo nga kjo familje, jo nga miqtë e mi dhe aq më pak nga beteja jonë e përbashkët. Do të jem gjithmonë në krah të tyre, ashtu siç ata kanë qenë në krahun tim,” shkruan Xhaferri.












