Partia Demokratike po shkon drejt një ristrukturimi dhe ripërtëritjeje të plotë të strukturave të saj drejtuese. Gjatë punimeve të nesërme të Kuvendit Kombëtar, pritet të merren vendime thelbësore, duke filluar nga zgjedhja e anëtarëve të rinj të Këshillit Kombëtar.
I ftuar në një intervistë televiziv, deputeti i Partisë Demokratike, Luan Baçi u shpreh se procesi do të realizohet përmes një votimi të fshehtë. Në këtë garë përfaqësimi do të marrin pjesë rreth 1500 delegatë, të cilët do të kenë në dorë fatin e mbi 300 kandidaturave të spikatura dhe eksponentëve të rëndësishëm të forcës politike.
Nga kjo listë e gjatë, vetëm 150 prej tyre do të fitojnë të drejtën për të qenë pjesë e Këshillit Kombëtar. Ndërkohë, bazuar në statutin e partisë, të gjithë anëtarët ekzistues të këtij këshilli janë rikandiduar automatikisht.
Megjithatë, ky është vetëm hapi i parë i një procesi zinxhir që pritet të mbyllet brenda pak ditësh. Pas zgjedhjes së Këshillit të ri Kombëtar, brenda një afati prej 7 deri në 10 ditësh, ky organ do të mblidhet për të votuar hierarkinë e lartë të partisë. Këtu përfshihet Kryesia e Partisë Demokratike, Sekretariati, nënkryetarët, sekretari i përgjithshëm dhe drejtuesit e departamenteve.
Ky proces masiv ristrukturimi është paralajmëruar gjerësisht në media dhe rrjete sociale si një fazë vendimtare për t’i dhënë opozitës një fytyrë të re. Me përfundimin e këtyre zgjedhjeve të brendshme, partia më e madhe opozitare pritet të mbyllë zyrtarisht kapitullin e riorganizimit të të gjitha organeve të saj kryesore.
Partia Demokratike ka kaluar një nga periudhat më të errëta gjatë katër viteve të fundit, e përballur me goditje të forta politike që përfshinë heqjen e vulës, siglës, flamurit dhe financave.
Gjatë një interviste të fundit, deputeti demokrat, Luan Baçi, në një analizë të thellë të kësaj situate të bërë në nje emision televiziv deklaroi se mbijetesa e partisë dhe përfaqësimi në zgjedhjet e 2023-shit erdhën ekskluzivisht falë qëndresës së jashtëzakonshme të bazës së demokratëve.
Sipas tij, kjo krizë e thellë u shkaktua nga regjimi në pushtet, por u tejkalua përmes nismës së rithemelimit nga Sali Berisha. Teksa vëmendja është kthyer te kuvendi i radhës, i cili shihet si një pikë kthese për një rrotacion të mundshëm politik, një pyetje thelbësore ka ngjallur reagim të fortë: çfarë u detyrohet saktësisht lidershipi mbështetësve që nuk u larguan kurrë, pavarësisht humbjeve të njëpasnjëshme dhe tkurrjes së numrave?
Përballë këtij konstatimi për besnikërinë e militantëve në çdo protestë dhe vendim të partisë, përgjigjja e përfaqësuesit demokrat ishte e drejtpërdrejtë dhe vetëkritike.
Luan Baçi pranoi publikisht se lidershipi dhe vetë deputetët e zgjedhur kanë një detyrim madhor ndaj çdo mbështetësi, një borxh aq të madh sa është e vështirë të gjenden fjalët e duhura për ta përshkruar. Ky moment thekson peshën e madhe që mban qëndresa e qytetarëve në ringritjen e forcës më të madhe opozitare në vend.
