“Mirëdita! Pasaportat, ju lutem! Duhet t’ju marrim edhe gjurmë të së paku 4 gishtërinjve. Edhe fotografi. Faleminderit dhe ju uroj qëndrim të këndshëm!”.
Kështu do të duhej të dukej nga 10 nëntori i këtij viti hyrja në Bashkimin Evropian dhe në Zvicër, Norvegji, Islandë e Lihtenshtajn – vende anëtare të zonës së lëvizjes së lirë Schengen – për qytetarët e rreth 60 vendeve, përfshirë edhe ata të Ballkanit Perëndimor (ku bën pjesë edhe Shqipëria).
Për verën e ardhshme është paralajmëruar zbatimi edhe i Sistemit të dytë Europian të Informacionit dhe Autorizimit të Udhëtimit (ETIAS), i cili u kërkon udhëtarëve nga vendet që kanë regjim pa viza me BE-në të aplikojnë online për lejen e hyrjes.
Me ndryshimet e reja nga mesi i vitit 2025, ETIAS do t’u kërkojë qytetarëve të rreth 60 vendeve (perfshire edhe Shqiperine) që të plotësojnë një formular të veçantë nëpërmjet internetit ose aplikacionit celular, përpara se të udhëtojnë.
Me rastin e plotësimit të aplikacionit për herë të parë, pasagjeri fut të dhënat personale, e-mailin dhe numrin e telefonit, si dhe detajet e dokumentit të udhëtimit.
Udhëtari do të duhet, gjithashtu, të fusë detaje rreth arsimit dhe punësimit aktual, si dhe detaje rreth udhëtimit të planifikuar dhe qëndrimit në vendin e BE-së.
Do të kërkohen edhe detaje për çdo dënim penal, për udhëtime në të kaluarën në zona lufte ose zona konflikti, si dhe informacione nëse personi është dëbuar nga ndonjë vend. Udhëtarët do të duhet të paguajnë edhe një tarifë shtesë prej 7 euro, një pagesë që do të realizohet me kartë bankare.
